HLAWHTLINNA KAILAWN

        I. Tihian kan ti thin :

              Loneituten harsa kan tih ber pakhat chu ‘ Kan tih dan pangngai thlakthleng a, mithiamte thurawn anga tih’ hi a ni awm e. kan ngaihdan leh tih thin dan sawh sawn harsa kan ti em em a. “ Tihian kan ti thin a, a tha ve tho “ tih kan tan chhan chawk mai. Mahse, tunlai mithiamten an hmuhchhuah belh zel leh min tih tir an tum dan chu a tha ve tho aia tha, kan tha sen titlem deuh si a thar tam zawk bawk si a ni. chhungkaw kham khawp thar a tawk ta lo. Thar ve thei lo chhungkaw tam tak an awm a, chungte chu a ti thei ten kan thar kep a ngai.

       II. Ril tam chuan eitur a mamawh :

              Ran ek leh hnim hnah tawih leithate hi ngah tawk ila chuan fertilizer hmang vak lo pawhin buh leh thlai kan thar hlawk ngei ang. Fertilizer hi mithenkhatin kan hmang tha ngam lo a ni awm e. Lei a tichhia, hriselna atan a tha lo, ti te an awm a ni awm e. Mahse, Mizoram pawn atanga buhfai leh thlai chi hrang hrang (Alu, Dailuah, Purun etc.) kan lak luh leh kan ei mek te hi fertilizer a uar taka an chawm atanga an thar a ni. Kan ram leilung, a bikin kan leilet te hi an ril a tam tawh a, chaw tha an mamawh tawh hlawm a. Chaw tha kan pek loh chuan kan thlai te tan eitur an pe tha thei ta bik lo. ‘Ril tam chuan ei tur an mamawh a’, chu eitur an mamawh tak chu Fertilizer (Urea, DAP,MOP) hmang hian kan pe thei a ni. Hei hi erawh kan hriat a ngai –Fertilizer te hi hman dan tur bik leh hman zat tur nei vek an ni a, rinthua hman mai mai tur a ni lo. Mithiamte thurawn anga hman tur a ni .Khawsik tihdam nan kawthalo damdawi hman chi a ni lo.

       III. The ngawt a:

              Natna leh hri ven nan inchiu leh ban zai te kan ti a, zenghri danna pawh naupang kan eitir thin. Buh leh thlai te pawh hian an mamawh ve tho. Chu chu buh leh thlai dangte kan chin hmaa a chi damdawia bual leh chiah (Seed treatment) te hi a ni. Thenkhat chuan, Natna lan hma hmaa sum leh tha seng zawnga hma lo lak chum “ Teh ngawt a,” an ti thin. Mahse natnain kan buh leh thlai dangte a tihbuai tawh hnua enkawl dam leh tura kan senso nena khaikhin chuan damdawia a chi kan sawngbawl hlek hi a hlawk fe zawk a ni.

       IV. Tuthlawh leh chemkawm :

              Loneitute tana hna hahthlak ber mai, tih loh theih si loh chu hlo thlawh hi a ni.Thenkhatin tuthlawh kan lek a, thenkhatin chemkawm kan lek a. Tha tam tak kan seng a,kan thlawh hneh loh chuan kan thar tlem phah bawk si. Mithiamten tur (hlo tur ) hmanga hlo thlawh dan awlsam an hmuhchhuah hi a va tha em! Hlo chi tiak tur a ven theih a(Butachlor), a la tiak lui hram kah hlumna tur (2,4-D) a awm leh zel bawk si. Hlawhtling tur leh thar tam tur chuan hengte hi kan hman uar a tha ang.

       V. A hlawk tur a ni:

              Kan buh leh thlai chin thin pangngai kum tam tak kan chin hian that tawk lohna a nei tih hriat a tha khawp mai. A chi ngai kan chin rei chuan a da zat telh telh a, a thar hlawk lo telh telh thei a. Natna pawh a inkaichhawng awl bik a ni. Mi thenkhat chuan buh peng duh lo tak, a kung sang leh tlu duh bawk si te kan ching lui reng a. Buh tawi, thar rang leh hlawk chi tam tak ( DRRH, KRH, Shahsarang,Balum, etc) a awm tawh a nia. Kan tha sen atanga chhutin kan thar hlawk tur a ni. Loneitu, mi tam tak te hian kan tha mai bakah kan ngaihtuahna I seng tak tak ang u. Tichuan kan hlawhtling ngei ang.